Қазақстан аумағында коронавирустық инфекцияның пайда болуы мен таралуына жол бермеу жөніндегі ведомствоаралық комиссияның шешіміне сәйкес түрік әуе компанияларына Түркістан-Ыстанбұл бағытында халықаралық тұрақты рейс ашуға және Шымкент-Ыстанбұл бағытында тұрақты рейсті қайта бастауға рұқсат етілді.
Атап айтқанда, Turkish Airlines әуе компаниясы 22 мамырдан бастап Түркістан-Ыстанбұл-Түркістан бағытында жаңа рейстер ашуды жоспарлап отыр. Бастапқы кезеңде рейстер А-321Neo әуе кемесімен аптасына 1 рет орындалады.
Сонымен қатар, түріктердің Pegasus Airlines әуе тасымалдаушысы 23 мамырдан бастап Шымкент және Ыстанбұл қалалары арасында тұрақты рейстерді орындауды қайта бастауды жоспарлап отыр. Рейстер бастапқы кезеңде B-737 әуе кемесімен аптасына 1 рет орындалады.
Оқи отырыңыз: Lufthansa компаниясы Қазақстанға әуе рейстерін орындауды қайта бастады
Эпидемиологиялық жағдайдың жақсаруына қарай рейстер санын кезең-кезеңімен ұлғайтылмақ.
Рейстер санитарлық-эпидемиологиялық талаптарды қатаң сақтай отырып және әуе компанияларының сайттарында жарияланған кестеге сәйкес орындалады.
