Бүгін ҰБТ басталды. Тест тапсырушылар нені білуі керек?

Бүгін ҰБТ-ның бірінші күні тек 6 512 талапкер тест тапсырады. Ел аумағындағы 161 пунктің 54-і ғана істейді. Тест тапсырушылар ҰБТ қағидаларымен қатар санитарлық талаптарды сақтауы тиіс.

Informburo.kz ҰБТ тапсырушылар мен олардың ата-анасына тестілеуге қатысты қажет ақпаратпен бөліседі.

Тестілеу пунктінде медициналық-санитарлық талаптар сақталады

Биыл коронавирус жағдайына байланысты ата-аналарға және басқа да адамдарға ҰБТ өткізу пунктеріне келуге және ғимарат аумағында жүруге тыйым салынады. ҰБТ өткізу пунктері баррикадалық ленталармен қоршалады. Әрбір аудиторияда бейнебақылау камерасы орнатылған. ҰБТ-ның қалай өтіп жатқанын кез келген адам онлайн-трансляциядан көре алады.

Тестілеу пунктінде медициналық-санитарлық шаралар қабылданған:

• дезинфекциялық тонельден өту;
• арнайы дезинфекцияланған кілемшеде аяқ киімді зарарсыздандыру;
• дене қызуын өлшеу;
• қолды зарарсыздандыру сұйықтығымен өңдеу;
• медицина маскасын беру.

Тестілеуге кіргізу және отырғызу кезінде тест тапсырушылар арасындағы арақашықтық кемінде 2 метр болуы тиіс. Әрбір аудитория бактерицидтік құралдармен және ауа рециркуляторларымен желдетіліп, өңделеді. Санитарлық талаптар қатаң сақталатындықтан аудиторияны жартысын ғана толтыруға болады.

Оқи отырыңыз: 132 мың үміткер – 54 мың грант. Биылғы түлектер ҰБТ-дан сүрінбей өтуі үшін нені білуі тиіс?

Биыл ҰБТ-ға бірнеше жаңашылдық енгізілді

Ұлттық бірыңғай тестілеу форматы өзгермесе де, қағидаларына жаңашылдық енгізілді:

• тестілеуге кіретін қатысушыға алғаш рет бет-әлпетін тану – Face ID көмегімен тұлғаны сәйкестендіру тәсілі қолданылады;
• 2020 жылы ҰБТ сертификаты электрон нұсқада беріледі;
• білім беру грантын тағайындауда да электрон куәлік енгізілген;
• академиялық кезең аяқталғанға дейін ҰБТ-да шекті балын жинай алмағандар жыл бойы тестілеуден өте алады;
• педагогика мамандықтарына тапсыратындардың шекті балы 60-тан 70-ке дейін көбейді;
• талапкерлерден тестілеу кезінде қолдануға тыйым салынған заттар табылса немесе ҰБТ бейнежазбасын қарағанда мұндай көмекші заттар пайдаланғаны анықталса, ҰБТ нәтижесі мен білім беру гранты жойылады;
• тестілеуге 10 минут қосылып, тест тапсыру уақыты 4 сағатқа дейін ұзартылды;
• алғаш рет калькулятор пайдалануға рұқсат беріледі, бірақ өзімен бірге калькуляторды өзімен алып келуге тыйым салынады;
• тестілеуден өз күшімен, әділ жолмен 140 ұпай жинаған әрбір тест тапсырушыға заманауи, соңғы модельдегі ноутбук сыйға беріледі;

Оқи отырыңыз: ҰБТ тапсырушылар нені білуі керек?

ҰБТ-ны үйден бақылауға болады

Ата-анаға, балаларды алып жүруші тұлғаларға ҰБТ пункттерінде күтуге тыйым салынады. Ата-ана тестілеу барысын ҰБТ өтіп жатқан жерге келмей-ақ, үйінде отырып көре алады. Онлайн трансляцияға арналған сілтеме БАҚ, әлеуметтік желілер арқылы таратылып, көпшілікке жария етіледі. Кез келген адам сілтеме арқылы өтіп, ҰБТ-ның қалай өтіп жатқанын көреді.

Биыл кез келген адам ҰБТ-ны Digital Agent қосымшасы арқылы бақылай алады. ҰБТ өткізу ережелерін бұзу фактісі анықталса, фото/бейне жазбаны Digital Agent қосымшасына тікелей жіберуге болады немесе 1414 және 1424 телефондарына хабарласа алады. Орталық әрі қарай шара қолданады. ҰБТ-ның өткізілуін Сыбайлас жемқорлыққа қарсы қызмет жанындағы арнайы мониторингтік топтың мүшелері қадағалайды.

Оқи отырыңыз: Оқушыларға арналған гранттар. Qazbilim олимпиадасына қалай қатысуға болады?

2020 жылы 54 мыңға жуық білім беру гранты бөлінді

Биыл жоғары білімі бар кадрларды (бакалавр) даярлауға бөлінген грант саны – 53 864. Гранттың басым бөлігі:

• инженерлік, өңдеу және құрылыс салалары – 14 681;
• педагогикалық ғылымдар – 8 243;
• жаратылыстану ғылымдары, математика және статистика – 4 088;
• ақпараттық-коммуникациялық технологиялар – 3 815;
• денсаулық сақтау мамандықтарына 2 700 грант бөлінген.