Алматы облысында сот орындаушысы балалардың алиментін иемденіп алды

Көрсетілген уақыт ішінде баланы асырауға сот орындаушысының арнайы шотына борышкердің жалақысынан 816 мың теңге аударылған. Бұл туралы Алматы облысының прокуратурасы жазды.

Сот орындаушысы бұл ақшаны әрі қарай баланың анасының шотына аудармаған.

"Алимент аударушы ақша аударып отырғанына қарамастан, сот орындаушысы борышкердің жүргізуші куәлігінің қолданылуын тоқтата тұруға дейінгі барлық шектеу шараларын қабылдады. Сот орындаушысының жоғарыда аталған заңсыз әрекеттерінің нәтижесінде әкесі жұмысынан және табыс көзінен, ал баласы өзіне тиесілі алименттерден айырылды", – деп жазылған хабарламада.

Облыс прокуратурасы жолдаған материалдар бойынша полиция Департаменті сот орындаушысына қатысты ҚР Қылмыстық кодексінің 251-бабы (Жеке сот орындаушысының өкілеттіктерін теріс пайдалану) бойынша қылмыстық іс қозғады.

Оқи отырыңыз: Алимент төлемеген 16 мың азаматқа Қазақстаннан шығуға тыйым салынды

Сондай-ақ, қабылданған шаралармен борышкердің жүргізуші куәлігі қалпына келтірілді және ол бұрынғы жұмысына қайта орналастырылды.