Алматы облысындағы колледжде студенттер ғимаратты әрлеу жұмысына тартылған

Алматы облысында Талғар агробизнес және менеджмент колледжі студенттерінің ғимаратқа ішкі әрлеу жұмыстарын жүргізіп жатқан бейнежазбасы тарады, деп хабарлайды 31-арнаның Информбюро ақпараттық бағдарламасы.

Бейнежазбада студенттердің қабырғаларды ақтап, батареяларды сырлаған, асхана жабдықтарын тазалап отырған сәті түсірілген.

Асхана меңгерушісі нысанда тазалық жұмыстары жүргізілгенін, бірақ оған студенттер қатыспағанын айтты.

"Бұл жерді сүріп-тазалау үшін Алтын орда базарынан екі Қарақалпақстан азаматын алып келдім. Әрқайсысына 15 мың теңгеден төледім", – деді асхана меңгерушісі Қуатбек Мырзагелдиев.

Оқи отырыңыз: Қазақстанда колледж студенттерінің стипендиясы 50% көбейді

Колледж директоры студенттерді сабақ уақытында жұмысқа тартпағандарын айтты. Студенттер тек сенбілік кезінде өзі білім алатын оқу ордасының маңайын тазалауға шығып тұрады.  

"Мұндай тазалау жұмыстары сенбілікте, ара-арасында болып тұрады. Мына жерде өздерінің ұстаздары қызмет етіп жатыр, оларға неге келіп көмектеспеске? Балаларды еңбекке баулудан ешқандай әбестік көріп тұрған жоқпын", – деді Талғар агробизнес және менеджмент колледжінің директоры Динара Бұларбекқызы.

Директордың айтуынша, бұл жерде қысым немесе мәжбүрлеу болған жоқ. Көмектесуге ниетті әр мұғалім, не студент қалауынша қол ұшын созуға құқылы.