Алматыны "түтіндетіп" жүрген көліктер қала ішінде тексерілетін болады

Алматыда ауаға шамадан тыс зиянды қалдықтар шығаратын көліктерді анықтаудың жаңа әдісі іске қосылды, деп хабарлады 31 арнаның Информбюро ақпараттық бағдарламасы.

Енді темір тұлпардың түтінін кіреберістегі экопосттардан бөлек, қала ішінде арнайы құрылғы - спектрометр тексереді. Аппарат машинадағы улы газды өлшейді.

Демек, көлікті тоқтатудың қажеті жоқ. Ол машинаны қозғалыс кезінде түсіріп, темір тұлпар бөлетін зиянды қалдықты анықтай алады.

Әкімдік өкілдерінің хабарлауынша, құрылғыны сергек камерасына енгізіп, зиянды қалдық шығарған көліктердің нөмірін автоматты түрде анықтау жоспарланған. Осылайша, машинасынан көп мөлшерде улы газ шығатын жүргізушілерге 10 айлық есептік көрсеткіш, яғни, 37 мың теңге айыппұл салынады.

Айта кетейік, тексеріс кемінде 3000 шақырым жүрісі бар машиналарға жүргізіледі. Алайда, көлік иелерінің дені бұл бастаманы құптамайды.