"Алтын алқа" мен "Күміс алқа" иелеріне жәрдемақы автоматты түрде тағайындалады

31 наурыз 2023, 16:21 Авторға хат жазу قازاقشا Qaz

Бұл тәсіл алдағы уақытта өзге де мемлекеттік қызметтер көрсетуде қолданылады.

"Алтын алқа" немесе "Күміс алқа" алқаларымен марапатталған аналарға жәрдемақы тағайындау толықтай автоматтандырылды, деп хабарлады Еңбек және халықты әлеуметтік қорғау министрлігі.

Соған сәйкес, қызмет көрсету мерзімі 7 күннен 1 күнге дейін қысқарады.

"Егер көп балалы ана "Алтын алқа" немесе "Күміс алқа" алқаларымен марапатталған болса, тиісті мәліметтер Еңбекминінің ақпараттық жүйесіне автоматты түрде түседі. Әрі қарай жүйе проактивті форматта жәрдемақы тағайындауға келісім алу үшін 1414 нөмірінен SMS-хабарлама жібереді. SMS-хабарламаға оң жауап алынған жағдайда жүйе жәрдемақы тағайындау туралы шешімді мүлдем адамның қатысуынсыз автоматты түрде қабылдайды" делінген министрліктің ресми хабарламасында.

Еңбек және халықты әлеуметтік қорғау министрлігі алдағы уақытта бұл тәсілді басқа да мемлекеттік қызметтерді көрсету кезінде қолданысқа енгізбек.

Оқи отырыңыз: "Алтын алқалы" аналарға берілетін жәрдемақы мөлшері өседі