Ақтау маңындағы ұшақ апаты: Тоқаев премьер-министрге тапсырма берді

25 желтоқсан 2024, 18:08 Авторға хат жазу قازاقشا Qaz

Оқиға орнында зардап шеккендерге толық қолдау көрсету үшін шаралар қабылданды.

Премьер-министр президентке Ақтау маңында болған ұшақ апатына байланысты ағымдағы жағдай туралы мәлімдеді, деп хабарлайды Үкіметтің баспасөз қызметі.

Мемлекет басшысына Үкіметтік комиссияның Ақтау қаласы әуежайының маңында болған Аz Airlines әуе компаниясының Embraer 190 ұшағының апатқа ұшырау себептерін тексеру және зардап шеккендерге көмек көрсету жөнінде жүргізіп жатқан жұмысы туралы баяндалды.

"Оқиға орнында зардап шеккендерге толық қолдау көрсету үшін шаралар қабылданды. Төтенше жағдайлар қызметі 430-дан астам қызметкер мен 80-ге жуық техниканы жұмылдырды. 29 адам ауруханаға жатқызылды. Зардап шеккендерге қажет медициналық, психологиялық және басқа да көмек көрсетіліп жатыр. Апаттық-құтқару жұмыстары жалғасып жатыр", – делінген хабарламада.

Әзербайжан Үкіметімен бірлесіп шетел азаматтары мен қаза болған жолаушылардың отбасыларына қажет көмек көрсетіліп жатыр.

Президент зардап шеккен азаматтарға көмек көрсету жұмысын ерекше бақылауда ұстауды және көршілес елдердің үкіметтеріне қажетті жәрдем көрсетуді тапсырды.

Оқи отырыңыз: Ақтау маңында болған ұшақ апатының себептерін анықтау үшін Үкіметтік комиссия құрылды