Білім гранттары: Қай мамандықтарға байқау жоғары болды

Ұлттық тестілеу орталығы 2024-2025 оқу жылына арналған білім грантына көп талас болған мамандықтар тізімін жариялады. 

Орталық мәліметінше, 2024-2025 оқу жылына бакалавриатқа 78 мыңнан астам грант бөлінді. Гранттардың ең көп бөлігі инженерлік және техникалық бағыттарға берілді. 

Бір гранттық орынға ең үлкен конкурс "Стоматология" БББТ бойынша болды. Бұл мамандық бойынша бір орынға 35 талапкер таласты. Әрі қарай "Халықаралық қатынастар және дипломатия" (11 адам), "Дене шынықтыру мұғалімдерін даярлау" (10 адам), "Аударма ісі" және "Психология" (9 адам) болды. 

Сондай-ақ зардап шеккен 6 өңірдің (Ақмола, Ақтөбе, Атырау, БҚО, Қостанай, СҚО) мектеп түлектері үшін 20% мөлшерінде квота көзделген. Айта кетейік, су басқан өңірлерден 20 мыңнан астам түлек гранттар конкурсына қатысуға өтініш берген. 

ТЖ өңірлерінің түлектері алдымен жалпы конкурсқа қатысты және 10 мыңнан астам адам барлық талапкерлермен бірдей жалпы конкурс бойынша өтті. ТЖ квотасы аясында 5 мыңнан астам адам грант алды. 

1130 адам қаңтар немесе наурыз айындағы ҰБТ сертификаттарын пайдаланды.