ҚМДБ мешіттегі төбелес туралы мәлімдеме жасады

Әлеуметтік желіде мешітте болған оқиға таралуда. Осыған байланысты ҚМДБ мәлімдеме жасады. Бұл туралы ҚМДБ баспасөз қызметі хабарлады.

"Өзге өңірден Шымкент қаласына келген біртоп азамат мешіт имамының ескертуіне қарамастан бірнеше рет жамағат намазын бұзған. Өзге мәзһабта намаз оқыған олар жамағат пен имамның өтінішіне құлақ аспай, мешіт ережесін өрескел бұзған", – деп жазды ҚМДБ баспасөз хатшысы Ағабек Қонарбайұлы.

Намаз кезінде “әмин” дұғасын қатты дауыспен айтқан жандардың әрекетіне төзбеген мешітке тұрақты келуші бір азамат олардың біріне қол жұмсаған.

"Нәтижесінде имам жамағат намазын тоқтатуға мәжбүр болған. Оқыс оқиға дер кезінде тоқтатылып, полиция қызметкерлері тиісті жұмыс жүргізуде", – деп жазды Ағабек Қонарбайұлы.

Қазақстан мұсылмандары діни басқармасы мешітке келуші жамағатты мешіт ережесіне бағынуға, сонымен қатар құлшылық үйінде сабыр сақтап, көркем мінез танытуға шақырады. 

Оқи отырыңыз: "Қызылжар" орталық мешітіндегі оқиға: Азамат видеоға түсіргені үшін емес, имамды ұрғаны үшін қамалды

Еске салсақ, ҚМДБ бекіткен "Мешіт ережесі" бойынша Қазақстан мұсылмандарының ауызбіршілігі мен біртұтастығын қамтамасыз ету үшін намаз бен діни рәсімдер Әбу Ханифа мәзһабы бойынша орындалады.