Қазақстанда ата мен әженің немересімен араласу құқығы заңмен бекітілмек

6 ақпан 2023, 11:30 Авторға хат жазу قازاقشا Qaz

Бұл үшін "Неке және отбасы туралы" ҚР кодексіне жаңа бап енгізіледі.

Қазақстанда ата-мен әженің немересімен, сондай-ақ баламен оның әпке-бауырлары, өзге де туыстарының қарым-қатынас жасау құқығы енді "Неке және отбасы" кодексінде арнайы баппен айқындалады. Бұл туралы Ашық НҚА порталында Оқу-ағарту министрлігі жариялаған құжат жобасынан белгілі болды.

Оған сәйкес, "Неке және отбасы" кодексіне жаңа 73-1 бап енгізіледі. Онда "Аталар, әжелер, бауырлар, әпкелер және басқа туыстар баламен араласуға құқылы" деп жазылған.

Бапқа сәйкес, егер ата-ана баланың жақын туыстарына онымен қарым-қатынас жасау мүмкіндігін беруден бас тартса, дауды ҚР Балалардың құқықтарын қорғау саласындағы уәкілетті органы айқындайтын тәртіппен қорғаншылық немесе қамқоршылық жөніндегі функцияларды жүзеге асыратын орган шешеді.

Оқи отырыңыз:

Оқу-ағарту министрлігі заңға мұндай толықтыру енгізу қажеттігін ата-әжелер мен басқа туыстардың баламен қарым-қатынас тәртібін анықтауға байланысты дауларды шешуде қиындықтар туындағанымен түсіндірді.

Құжат жобасы 24 ақпанға дейін жария талқылауға ұсынылған.