Қазақстанда қылмыс жасаған жасөспірімдердің 47 пайызы еш жерде оқымаған

Адамның қылмыс жасауына 250 фактор әсер етеді. Олардың бастылары әлеуметтік, экономикалық, географиялық, миграциялық, демографиялық жағдайлармен байланысты. Осы орайда қоғамдық қауіпсіздікті қамтамасыз ету концепциясы әзірленіп, 2024-2028 жылдары арасында тиісті жарлықпен бекітіледі, деп мәлімдеді ҚР ІІМ әкімшілік полиция комитеті төрағасының орынбасары Ренат Зұлқайыров.

Комитет өкілінің айтуынша, концепцияның басты ерекшелігі – осы уақытқа дейін жиналған қоғамдық тәртіпті сақтау саласындағы жүйелік қиындықтарды шешуге бағытталғандығы. 

"Жүйелік басты қиындықтардың бірі – мемлекеттік органдар әрекетінің бытыраңқылығы. Әркім алдын алу шарасы дегенді әртүрлі түсінеді. Сол себепті қай органның нақты неге жауап беретінін белгілеу қажет", – деді Ренат Зұлқайыров. 

Оқи отырыңыз: "Айыппұлмен құтылмайды, сотта татуласпайды". Отбасында зорлық-зомбылық көрсететіндерге жаза күшейді

 Ары қарай ол азаматтардың қылмысқа баруына себепкер бірнеше факторды атады. 

"Қылмыскерлердің 80 пайызы – жұмыссыз жүрген азаматтар. Ал қылмыс жасаған жасөспірімдердің 47 пайызы еш жерде оқымаған және жұмыс істемеген. Бұдан өзге адамдар қылмыстың 50 пайызын мас болғанда жасайды", – деді комитет өкілі. 

Оқи отырыңыз: Оқушыларға неше жастан, қайда, қандай және қанша уақыт жұмыс істеуге рұқсат? 

Сондай-ақ, ол Астанада тең жарты қылмысты шеттен келгендердің жасайтынын атап өтті. Айтуынша, бұл мәселелерді күшпен шешу мүмкін емес.