Шымкентте қазақстандықтарды 56 млн теңгеге алдаған әйел сотталды

34 жастағы алаяқтықтың құрбаны болғандардың қатарында Тараз, Түркістан облысы және Шымкенттің 53 тұрғыны бар. Бұл туралы Polisia.kz жазды.

Алаяқ оларды электроника дүкендерінің бірінің филиалдарынан тауарлық несие алуға көндірген. Қарызды төлемеуге болатынын жеткізген ол бұл сауда нүктелері жақын арада жұмысын тоқтатып, толығымен жабылады деп сендірген.

Несиеге рәсімделген электрониканы алаяқ әйел құрбандарынан жарты сомасына сатып алып отырған. Алаяққа ұрынғанын сенгіш азаматтар ай сайынғы төлем туралы ескерту-хабарлама түскен кезде ғана білген.

Оқи отырыңыз: Банк карталарымен жасалатын алаяқтықтың қалай алдын алуға болады?

Бұл жайт бойынша полиция қызметкерлері ҚР Қылмыстық кодекстің 190-бабымен сотқа дейінгі тергеу жүргізді. Ұсталған азаматшаның кінәсін дәлелдейтін айғақтарды жинап, тергеушілер қылмыстық істі сотқа жіберді.