Солтүстік Қазақстан облысында 500-ге жуық ірі қарадан сарып ауруы анықталды

24 қыркүйек 2021, 08:56 Авторға хат жазу قازاقشا Qaz

Мал иелері сиырлары үшін берілетін өтемақы мөлшері мардымсыз екеніне өкпелі.

Солтүстік Қазақстан облысында бруцеллез жұқтырған мал саны көбейіп барады. Қазірдің өзінде бес жүзге жуық ірі қарадан сарып ауруы анықталған, деп хабарлады 31-арнаның Информбюро ақпараттық бағдарламасы.

Бір күн ішінде қорадағы бүкіл малынан айырылғандардың бірі Саят Сәдуақасов ауру ошағын анықтай алмай келе жатқан мал дәрігерлерін кінәлайды. Соның салдарынан індет жыл сайын күш алады. Мал иелері, сондай-ақ, тәркіленген сиырлардың өтемақысы ретінде жарты бағасы ғана төленетініне де наразы. Індеттің таралуына байланысты тұрғындар сиырларын ет комбинатына өткізуге мәжбүр.

Қызылжар ауданы ветеринарлық станциясының директоры Ербол Багеновтың түсіндіруінше, өңірде биыл бруцеллез жылдағыдан әлдеқайда қатты асқынып тұр. Облыстың он ауданы мен Петропавл қаласында 412 бас ірі қара малдан бруцеллез анықталған. Әсіресе, Есіл, Қызылжар, Уәлиханов аудандарында індет дендеген.