Тоқаев балабақшалардан кейін жеке мектептерді де ваучер тәсілімен қаржыландыруды тапсырды

Тұрғылықты жеріне қарамастан, әрбір баланың білім алуына қолайлы жағдай жасау – мемлекеттің міндеті. Орта білім беру саласына ваучерлік тәсілмен қаржыландыруды енгізуге болады, деп мәлімдеді мемлекет басшысы Қасым-Жомарт Тоқаев үкіметтің кеңейтілген отырысында. 

"Мектепке дейінгі және орта білім беру саласында әділ бәсеке болуы қажет. Бюджет қаржысын үнемдеп, қаражаттың ашық жұмсалуын қамтамасыз ету маңызды. Бұған жол ашатын тәсілдерді енгізу жұмыстарын жалғастыру керек. Осы орайда мектепке дейінгі мекемелерді ваучерлік тәсілмен қаржыландыратын пилоттық жобаны атап өткен жөн. Мемлекеттік тапсырыс белгілі бір білім беру мекемесіне байланбайтын болды. Соның нәтижесінде, ата-аналар балабақшаны өздері таңдауға мүмкіндік алды. Енді бұл тәжірибені орта білім беру саласына енгізуге болады. Тұрғылықты жеріне қарамастан, әрбір баланың білім алуына қолайлы жағдай жасау – мемлекеттің міндеті", – деді президент. 

Ары қарай мемлекет басшысы үш жылда мыңнан астам мектептің жаңартылатынына тоқталды. Осы орайда орта білімге инвестиция тартуға шақырды. 

"Биыл "Жайлы мектеп" ұлттық жобасы аяқталады. Барлық аймақта заман талабына сай тірек мектептер желісі құрылып жатыр. Менің тапсырмаммен үш жыл ішінде тағы 1300 мектеп жаңғыртудан өтеді. Бұдан бөлек, Үкімет заманауи мектептер салуға қолайлы жағдай жасап, орта білім беру саласына жеке инвестиция тартуы қажет", – деді Қасым-Жомарт Тоқаев.