"Жедел жәрдем шақыра алмаймыз": Көкшетауда 170 отбасы аты жоқ көшелерде тұрып жатыр

Көкшетаудағы "Бірлік" ықшам ауданындағы 170 жаңа үйдің тұрғыны бес жылдан бері атаусыз көшеде тұрып жатыр, деп хабарлады 31-арнаның Информбюро ақпараттық бағдарламасы.

Жалғыз анықтамалық нүкте – дүкен мен мектеп. Тұрғындар таксиді де, жедел жәрдемді де сол жерге барып күтіп тұруы керек.

"Таксиге тапсырыс берем десең, қиындық туындайды: жаңбыр жауса да, жел соғып тұрса да, мектеп немесе балабақша алдына барып күтіп тұрамыз. Көше атауын беріп, әр үйдің нөмірленгенін қалаймыз", – деді Көкшетау тұрғыны Индира Қоспанова.

Қала әкімшілігі бұл мәселеден хабардар. Биыл көктемінде қоғамдық тыңдаулар өтіп, тұрғындар көшелерге қазақ билерінің құрметіне атау беруді ұсынды. Бастама қабылданбады. Қалалық мәдениет басқармасы жаңа есімдер ерікті түрде емес, бірқатар ережені ескере отырып таратылатынын айтты.

"Дауыс беру қорытындысы бойынша "Бірлік" шағын ауданындағы көшелердің атаулары қайтадан қарауға жіберіліп, хаттамадан шығарылды. Қазіргі уақытта көше атауларын беру жұмыстары жүргізіліп жатыр. Бұл шара жыл соңына дейін аяқталады", – деп уәде берді Көкшетау қаласының мәдениет, тілдерді дамыту, дене шынықтыру және спорт бөлімінің басшысы Күнім Оразбаева.

Оқи отырыңыз: Шүкенов, Қашаубаев және Оңғарсынова. Қосшы қаласындағы көшелерге қазақтың көрнекті тұлғаларының есімі беріледі.